Олон улсын жүдо бөхийн холбооноос зохион байгуулдаг гранпри, “Их дуулга” тэмцээний 2026 оны цуврал Францын Парис  хотод гуравдугаар сарын 7-нд эхэлнэ.

2004 оноос эхлэлтэй Парисын “Их дуулга”-д 82 орны 530 жүдоч зодоглохоор мэдүүлэг өгчээ. Эрэгтэйчүүдээс 73 кг-д 54, 81 кг-д 53, 66 кг-д 52 жүдоч барилдахаар болсон нь хамгийн өндөр тоо бол эмэгтэйчүүдээс 70 кг-д 37 бөх зодоглохоор мэдүүлэг өгсөн нь хамгийн их ажээ.

Шинэ оны анхны “Их дуулга”-д манай улсаас эрэгтэй долоо, эмэгтэй найман тамирчин оролцох юм. Тодруулбал, эрэгтэйчүүдийн 60 кг-д Э.Ариунболд, Т.Түмэнжаргал, 66 кг-д Ё.Басхүү, Ө.Жанцандорж, 73 кг-д О.Уранбаяр, Л.Анхзаяа, 81 кг-д О.Шинэбаяр, эмэгтэйчүүдийн 48 кг-д Ж.Анударь, Г.Наранцэцэг, 52 кг-д М.Нандин-Эрдэнэ, М.Уранзаяа, 57 кг-д Т.Ариунзаяа, 63 кг-д Л.Энхрийлэн, -78 кг-д А.Дуламсүрэн, О.Хүслэн нар барилдана. Уг тэмцээнд зохион байгуулагч орноос гадна 18 улс 10-аас дээш хүний бүрэлдэхүүнтэй очихоор мэдүүлжээ.

Парисын “Их дуулга”-аас хамгийн сүүлд 63 кг-ын жинд гавьяат тамирчин Б.Ганхайч хүрэл медаль хүртсэн нь 2024 он юм. Харин 2023 онд Б.Эрхэмбаяр мөнгө, О.Уранбаяр хүрэл медаль хүртэж байв.