Олон улсын олимпын хорооны 145 дахь удаагийн чуулган Италиийн Милан хотноо эхэллээ.

Уг чуулганд ОУОХ-ны гишүүн, МҮОХ-ны ерөнхийлөгч Б.Баттүшиг, МҮОХ-ны тав дахь ерөнхийлөгч, ОУОХ-ны хүндэт гишүүн Ш.Магван нар оролцож байна. Хоёр хоногийн дараа албан ёсоор хөшгөө нээх “Милан-Кортина 2026” өвлийн наадмын өмнө зохион байгуулж буй тус чуулган нь олимпын ажлыг дүгнэх, олимпын хөдөлгөөний стратеги, бодлогын чухал асуудлуудыг хэлэлцэх өндөр ач холбогдолтой юм.

Чуулганы үеэр ОУОХ-ны гишүүн, МҮОХ-ны ерөнхийлөгч Б.Баттүшиг Италийн ерөнхийлөгч Сэржо Маттарэллатай уулзахын зэрэгцээ Милан хотын захиргааны ордон “Палаццо Марино”, мөн дэлхийд алдартай “Ла Скала” театрт зохион байгуулсан ОУОХ-ны албан ёсны хүлээн авалт, уулзалтад оролцжээ.